წრიპა ბიჭის დღიური – ილუსტრირებული წიგნების სერია – მთელ მსოფლიოშია ცნობილი.
პირველი წიგნი ამერიკის შეერთებულ შტატებში 2007 წელს გამოვიდა და გამოცემისთანავე ბესტსელერად იქცა. დღემდე ამ სერიის 200 მილიონი ეგზემპლარია გაყიდული.
გრეგ ჰეფლის კომიკურ ისტორიებს თითქმის ყველა ქვეყანაში ინტერესით კითხულობენ ბიჭებიცა და გოგონებიც, უმეტესად, 8-12 წლის ასაკში.
წრიპა ბიჭის დღური განსაკუთრებით მიმზიდველია იმ ბავშვებისთვის, რომელთაც კითხვა ნაკლებად აინტერესებთ; სერია ეხმარება მშობლებს, დააახლოვონ შვილები წიგნებთან.
მილიონობით ბავშვის საყვარელი გმირი გრეგ ჰეფლი, ერთი შეხედვით, არაფრით გამოირჩევა: ის არც ზებუნებრივ ძალებს ფლობს, არც კეთილშობილია, ვერც ჭკუამახვილს ვუწოდებთ… არადა საოცრად პოპულარული პერსონაჟია. ხშირად მშობლებსა და მასწავლებლებს უკვირთ კიდეც, რატომ ირჩევენ ბავშვები მაინცდამაინც “წრიპა ბიჭის დღიურს” და რატომ კითხულობენ ასეთი გატაცებით. იუმორის გრძნობა არც ჰეკლბერი ფინს აკლდა, სკოლაში ბულერბიელი ბავშვებიც ხომ დადიოდნენ, დღიურს ანე ფრანკიც წერდა…
და მაინც, დღევანდელი ბავშვები წრიპა ბიჭს ირჩევენ. ამის მიზეზს სხვადასხვანაირად ხსნიან მშობლები, მასწავლებლები და თავად ბავშვები.